Borgarstjóri ákveður að takmarka útivist Reykvíkinga á kvöldin og um helgar

 Opið bréf til Borgarstjórans í Reykjavík
 
Hanna Birna Kristjánsdóttir
  
Heil og sæl.
Ég var að venju í strætó  í gær og þar sá ég látlausa tilkynningu um breytingar á tímatöflu sem á að taka gildi 1. febrúar og fékk sting í magann, þetta boðar ekkert gott afar lúmsk tilkynning sýndist mér. Þegar ég kom heim kannaði ég nánar það sem að baki liggur og það er ekkert lítið. Það á sem sagt að SKERÐA ÞJÓNUSTUNA verulega. Vagnarnir eiga aðeins að ganga á klukkustunar fresti á kvöldin og um helgar. Þetta kalla ég útigöngubann í höfuðborginni okkar.  
  
Þar sem stjórn Strætó bs virðist ekki bera skynbragð á að almenningssamgöngur eru til margs annars en að aka börnum í skóla og fólki til og frá vinnu vil ég benda á að með almenningssamgöngum getur borgarinn án mikilla takmarkana farið ferða sinna um borgina og sinna þar hversdagslegum erindum hvenær sem er allan daginn og á kvöldin. Má þar nefna að fara: til læknis, í leikhús, í bíó, í bókasafnið, listasafnið, Kolaportið, gefa öndunum, fara á völlin og í Laugardalinn, apótekið, í heimsókn á spítalann, elliheimilið, í sund o.sfv. Ef Reykvíkingar geta ekki sinnt hversdagslegum erindum um borgina sína á skömmum tíma tel ég að borgaryfirvöld hafi takmarkað ferðafrelsi íbúanna og þar með alvarlega brugðist skyldum sínum við þá og valdið þeim íþyngjandi tímaeyðslu og auknum kostnaði.
 
Ég vil hér með mótmæla þessari ákvörðun harðlega og óska eftir því að þú beitir þér fyrir því að Reykvíkingar geti komist með eðlilegum hætti millli hverfa og innan hverfa í borginn til að sinna sínum erindum. Ef önnur sveitarfélög sem standa að  Strætó bs vilja ekki taka þátt í almenningssamgöngum, einungis skólabílum og vinnuferðabíla þá verðum við Reykvíkingar að taka til okkar ráða og endurreisa SVR til að sjá um samgöngur innan borgarinnar.
Þetta þýðir að við höfum ekkert almenningssamgöngu kerfi lengur, aðeins skólabíla og vinnuferðarútur. Ég spyr ert þú sammála því að í borginni, sem þú átt að þjóna, séu samgöngur skertar svona grimmilega á tímum alvinnuleysis og aukinnar fátæktar einmitt þegar tækifæri er að efla almenningssamgöngur? Þú borgarstjóri góður og aðrir borgarfulltrúar megið velta því alvarlega fyrir ykkur hvaða hagsmunir eru í húfi á þessu erfiðu tímum enn á ný þjónustu Strætó. Ég sé ekki að það komi neinum til góðs nema bensínsölum og bílasölum.

Ég óska eftir skriflegu svari við þessu erindi mínu um vilja þinn í þessu máli.
Með góðri Kveðju

Kristbjörn Egilsson

Ferðum strætó fækkað vegna erfiðleika í rekstri

Athugasemdir

[Máni Ragnar Svansson, 26.1.2009 kl. 12:35]

Vanhæf Borgarstjórn   Vanhæf Borgarstjórn    Vanhæf Borgarstjórn

[Ólafur Guðbrandsson (IP-tala skráð) 26.1.2009 kl. 12:50]

Enn einu sinni eru almenningssamgöngur skertar hér á höfuðborgarsvæðinu og þar með takmarka ferðafrelsi almennra borgara og beina þeim yfir í einkabílinn og auka  umferð og mengun sem næg er fyrir. Borgaryfirvöld verða að skilja að almenningssamgöngur eru lífæð samfélagsins og ættu að auka og bæta þær til muna á þesum síðustu og verstu tímum.Við höfum efni á þeim og það þarf ekki allt og á ekki að skila gróða.'Eg er bíllaus og nota strætó daglega,líka á kvöldin og um helgar.

 'Eg spyr hvar eru vinstri grænir segjast þeir ekki vera umhverfisvænir?

[Guðríður Haraldsdóttir, 26.1.2009 kl. 13:15]

Ég hef notað strætó í mörg ár og finnst þjónustan hafa versnað talsvert, sérstaklega eftir að "nýja" kerfið var sett á laggirnar (2005?). Flutti upp á Skaga 2006, á æskuslóðirnar, vegna þess að það var kominn strætó þar, og það nægði mér að taka einn vagn þaðan og í vinnunna í Rvík, í stað þriggja vagna eftir breytingarnar í Rvík. Svo hækkaði bæjarstjórnin okkar stakt fargjald um 200%, eða úr 280 kr. í 840 kr. nú um áramótin. Það varð til þess að farþegum hefur því miður fækkað og umferð einkabíla þannig aukist á Vesturlandsveginum með tilheyrandi sliti, mengun og slysahættu. Ekki mikil framsýni þarna og nú munar svo litlu á verði að keyra þetta eða taka strætó. Að fækka ferðum svona mikið í Reykjavík er hrikaleg aðför að strætókerfinu.  

[Rannveig Thoroddsen (IP-tala skráð) 26.1.2009 kl. 15:09]

Sammála! Ég var bíllaus í mörg ár og notaði þá strætó en gafst upp vegna sífelldra breytinga og skerðinga á þeim leiðum sem ég notaði mest á þeim tíma og sá mig eiginlega tilneydda að kaupa bíl. Ég hef þó notað strætó jöfnum höndum bæði til að fara í og úr vinnu en einnig utan vinnutíma.   En enn og einu sinni eru almenningssamgöngur skertar hér í borg einmitt þegar margir ættu að geta séð sér hag í því að nota meira almenningssamgöngur  nú á þessum krepputímum. En með fyrirhugaðri  skerðingu sem taka á gildi þann 1. febrúar næstkomandi  held ég að margir gefist upp á strætókerfinu. Það er ekki hægt að bjóða fólki upp á það að bíða í klukkutíma eftir næsta vagni ef svo óheppilega vildi til að maður væri nýbúin að missa af vagni þegar manni dytti í hug að skreppa á milli húsa á öðrum tímum en annatímum á virkum dögum.  Það er því miður ekki hægt að segja að við Íslendingar stöndum okkur vel í umhverfismálum, teljum okkur kannski ekki þurfa þess að því að við séum svo fá og mengum því svo lítið.  Annað kemur þó á daginn sbr. að svifryksmengun fór 19 sinnum yfir heilsuverndarmörk á síðasta ári og þar af 9 sinnum vegna bílaumferðar.  Ég tel þó að umhverfisvitund almennings sé að vakna og sífellt fleiri eru tilbúnir til að leggja sitt af mörkum til draga úr mengun og þá sérstaklega þegar komið er til móts við hinn almenna borgara til að létta mönnum verkið.  Á vef Reykjavíkurborgar undir liðnum græn skref er margar góðar fyrirætlanir til að gera Reykjavík að fyrirmyndarborg í umhverfismálum. Eitt af þeim skrefum í þá átt er MIKLU BETRI STRÆTÓ, væntanlega til að hvetja fólk til að nota strætó og draga þar með úr notkun einkabílsins.  Er þetta rétta leiðin til að hvetja fólk til að nota strætó?  Ég bara spyr?. 

[Anna Sveinsdóttir (IP-tala skráð) 27.1.2009 kl. 09:28]

Fækkun ferða hjá Strætó er ekki tímabær þegar margir borgarar þurfa að reiða sig á almenningssamgöngur í erfiðu árferði. Á tímum sem þessum er þvert á móti tækifæri til að byggja upp stætókerfið almenningi til heilla!

[Ólafur Páll Jónsson (IP-tala skráð) 28.1.2009 kl. 01:37]

Þetta er mjög slæmt. Þegar kreppir að er samneysla, eins og strætó, ein af leiðunum til að halda í lífsgæði. Með því að skerða þjónustu strætó, sem er að ýmsu leyti ágæt en alls ekki frábær, þá er verið að skerða gæði þess að búa á höfuðborgarsvæðinu. Auk þess er strætó umhverfisvænn ferðamáti, og því felur skert þjónusta í sér skert tækifæri fólks til að tileinka sér umhverfisvænan lífstíl.